في نداء بالعامية للنائب سعد الحريري إلى اللبنانيين:

"بيروت بتدعيكم بإسم رفيق الحريري أنو تنتصروا للحقيقة وللمحكمة الدولية

بدنا نلتقي يوم الأربعا بساحة الحرية ساحة الشهدا وهيدا نداء رفيق الحريري"

صيدونيانيوز

وجه رئيس كتلة "المستقبل" النائب سعد الحريري مساء امس نداء الى اللبنانيين دعاهم فيه الى المشاركة بكثافة في احياء الذكرى الثانية لاستشهاد الرئيس رفيق الحريري في وسط بيروت "وفاء لذكرى الرئيس الراحل وسائر الشهداء الذين سقطوا لتثبيت مسيرة السيادة والاستقلال". وفي ما يلي نص النداء الذي وجهه الحريري بالعامية:
"مش بس كرمال رفيق الحريري وباسل فليحان وسمير قصير وجورج حاوي وجبران تويني وبيار امين الجميل ومروان والياس ومي وكل الشهدا اللي سقطوا، كمان كرمال لبنان، كرمال ولادنا كرمال وجودنا، كرمال حريتنا واستقلالنا، كرمال الحقيقة والحق بدنا نلتقي يوم الاربعا بساحة الحرية، ساحة الشهدا. هيدا نداء رفيق الحريري إلكن جميعا. في ناس عم بيراهنوا انو الذكرى السنوية الثانية حتكون دليل على انكن نسيتو، رفيق الحريري بيدعيكم باسم كل لبنان انو تفرجوا العالم، انو لبنان ما بينسى شهداؤه، رفيق الحريري بيدعي اهلنا ببيروت اهلنا بأحلى العواصم للاجتماع بقلب بيروت.
بيروت ناطرة كل شخص، كل عائلة، كل شاب كل صبية كل عامل كل فلاح كل طالب، كل واحد حب رفيق الحريري وشاعر اليوم بحجم غياب رفيق الحريري.
بيروت بتدعيكم، باسم رفيق الحريري انو تنتصروا للحقيقة، للعدالة، للشرعية، وللمحكمة الدولية. بيروت بتدعيكم لحماية كرامتها، ورفع الظلم عن قضيتها.
بتدعيم بيروت الى قلبها، يوم الاربعاء 14 شباط، ليكون يوم الانتصار على الفتنة والانتصار على الفوضى، يوم انتصار العدالة والحرية والديموقراطية. ساحات بيروت ناطرة اهل بيروت، وناطرة اهلنا من الجنوب وصيدا واقليم الخروب والشوف والمتن وكسروان وكل جبل لبنان، ناطره اهلنا من البقاع الغربي والاوسط والشرقي اهلنا من سعدنايل وعرسال والفاكهة، ناطره الاهل والاحباب من عكار وطرابلس وزغرتا والبترون والمنية والضنية وبشري والقلمون.

14 شباط مثل ما معنا روح رفيق الحريري، نحنا حنكون مع روح رفيق الحريري، وباسل فليحان وبيار امين الجميل وجبران تويني وجورج حاوي وسمير قصير، وكل شهدا الحرية ومعنا قضية الحق وقضية العدالة وقضية السيادة وقضية الشرعية، قضية لبنان".

(صيدونيانيوز12/2/2007)